Publizitatea sexistari begira

Anuncios.com web gunean ausaz aukeratutako 15 iragarki ikusi ondoren eta Emakundek ezarritako irizpideen arabera, hauek dira atera ditudan ondorioak:

1. Multiopticas
Iragarki honetan emakumeez gain, gizonezkoak eta haurrak ere agertzen dira, guztiak estilo berdinean eta toki beretan. Ez dute ezberdintasunik egiten emakume eta gizonezkoen artean eta ez dute emakumeen gorputzak erabiltzen produktua saltzeko, beraz, nire iritziz iragarki hau ez da sexista.

2.Gallo Gourmet
Iragarki honetan, gehienbat produktuaren irudiak agertzen dira. Emakume ezagun bat azaltzen da produktu berriak aurkezten, lehenengo over ahotsean eta gero baita irudietan ere. Hau emakumea izateak, sukaldatzea emakumeen zeregina dela baieztatzen dela badirudi ere, nire iritziz iragarki honetan ez. Neska famatua ez da agertzen sukaldean janaria prestatzen familiarentzat, jaten ageri da. Hau dela eta, nire iritziz, iragarki hau ere ez da sexista.

3.BBVA (Aprovecha tu banco)
Iragarkian BBVAko ofizina bateko zuzendaria agertzen da eta hau emakumea da. Beraz, nire iritziz ez da spot sexista bat, emakumeek garrantzi eta erantzukizun handiko lanpostuetan egon daitezkeela eta badaudela erakusten baitigu.

4. Apis (Tomates únicos, sabor irresistible)
Iragarki honetan azaltzen zaiguna zera da, emakume bat bi haurren ama dena eta berak ematen die bazkaltzen. Haurrak jateko marka horretako tomatea ematen dio eta umeak hori bakarrik jango du. Emakumea gaztea eta liraina da eta gainera ama ona, produktu hori ematen dielako bere haurrei. Iragarki hau sexista dela iruditzen zait haurrak zaintzea emakumeen lana soilik dela dirudielako eta gainera irribarre handi batekin egin behar duen lana. Gainera, emakumea gaztea eta ederra da, “emakume perfektua”.

5.Repsol (Logros)
Spot honetan emakume bat da protagonista, Repsoleko langile bat, zientzialaria hain zuzen ere. Nire iritziz, iragarkia ez da sexista, emakumea baita aditua eta gainera lan garrantzitsu bat burutzen du, etxetik kanpo.

6. PortAventura
Iragarkian adin guztietako pertsonak ageri dira, bai emakumezkoak eta baita gizonezkoak ere. Guztiak pozik azaltzen dira eta ez dira beraien artean ezberdintasunik egiten, beraz ez da iragarki sexista bat.

7.Seat León
Spotean lehenengo gizonezko gazte bat ageri da eta ondoren emakume gazte eta eder baten irudiak agertzen zaizkigu. Gizonezkoa autora iristean emakumea bereri begiratzen dio eta berekin sartzen da auto barrura. Nire iritziz, iragarki hau sexista da, emakumea sari gisa azaltzen delako. Auto hau erosi ezkero, horrelako emakumeak lortuko dituzu. Objektu huts bat bezala agertzen da emakumezkoaren irudia iragarki honetan.

8.Movitsar (Internet, tele, fijo)
Iragarki hau ez da sexista, adin guztietako gizon eta emakumeak azaltzen baitira egoera eta baldintza berdinetan, inongo ezberdintasunik egin gabe.

9.Orange
Spot honetan agertzen diren pertsonaiak, gizon zein emakumeak, baldintza eta egoera berdinetan ageri dira. Guztiak dira gazteak eta lirainak, baina ez soilik emakumeen kasuan, baita gizonezkoetan ere, beraz ez da sexista, ez baitu ezberdintasunik egiten bata eta bestearen artean.

10.Celta (Litros de imaginación)
Kasu hau Apis tomatearen antzekoa da. Iragarki honetan, emakume bat eta bere semea agertzen dira supermerkatuan eta honek zera iradokitzen digu, erosketak egitea eta seme-alaben osasunarengatik arduratzea emakumeen eginbeharra dela esklusiboki. Zure semea ondo zaindu eta ama ona izan nahi baduzu erosi gure esnea, hori da nik spot honekin ulertu dudan mezua. Gizonezkoa ez da ageri inondik inora haurrentzat eginiko elikagaien inguruko iragarki honetan.

11. 11822
Spot honen protagonista emakume bat da eta berak aholkatzen digu iragartzen den zerbitzua erabiltzea. Ez da gutxiestua edota egoera barregarri edo mingarri batean ageri, hau da, gizonezko bat izan bazen protagonista egoera berean agertuko zen; beraz, spot hau ez da sexista.

12.El Corte Inglés (Summertime)
Iragarki honetan neska lirainak, modeloak, agertzen dira protagonista bezala. Hau normala da modaren inguruko spota baita, baina gertatzen dena, nire iritziz, zera da, momentu batzutan garrantzia gehiago ematen zaiola nesken gorputzei arropari baino. Gainera, ez dira gizonezko modelorik agertzen. Beraz, nire ustez, iragarkia bada sexista.

13.Kalise
Iragarkiko protagonista gizonezko bat da eta agertzen diren beste pertsona guztiak adin ezberdinetakoak dira, gizon zein emakume. Beraz, iragarki honek ez du inolako ikuspegi sexistarik.

14.Viceroy
Spot honen protagonista Fernando Alonso famatua da. Zaldi batean muntatu behar da eta ikuslegoa dago, baina hauen ez dira agertzen pantailan osoki. Ikuslegoaren artean emakumeak zein gizonezkoak ageri dira, desberdintasunik egin gabe, beraz iragarki hau ere ez da sexista.

15. Atlético de Madrid
Azken iragarki honetan, hainbat haur ikusten dira lotan, beraien futbol taldeak irabaziko duela amesten. Hiru ume agertzen dira spot honetan eta guztiak mutilak dira. Badirudi, emakumeei ezin zaiela futbola gustatu, gizonezkoentzat soilik den kirola dela. Beraz, nire ustetan iragarki honek, nahiz eta ez izan oso handia badu kutsu sexista bat.

Nahiz eta aztertu ditudan iragarki gehienak ez izan sexistak, oraindik ere gaur eguneko garbiketa eta etxeko produktuen inguruko spot gehientsuenetan emakumeak izaten dira protagonistak; edota gizonezkoak, baina beti ere emakumezkoei aholkatzen. Argi dago, publizitatean oraindik ezberdintasunak nabariak direla, nahiz eta ez izan orain dela 30 urte bezalakoak.

Publizitatearen mugak

1. Zure markaren iragarkiak salaketa bat jasotzea oso negatiboa da marka irudiarentzat. Nahiz eta ez izan oso logikoa salaketa hori, gizarteak marka jakin hori entzutean, salatua izan zela gogoratuko du; inork ez du jakingo segur aski, gerora zer gertatu zen salaketa horrekin, baina berriren batean agertu bazen salaketaren istorioa, post-it negatiboa jada ipinita izango du marka horrek.

2. Nire iritziz, publizitatearen gaineko kontrola zorrotzagoa da, zuk nahi gabe ikusi dezakezulako eta edozein lekutan ager daitekeelako. Film edota programetan agertzen diren edukiak ikustea zuk erabakitzen duzu eta aurretik badakizu zer nolako irudi eta mezuak agertu ahalko diren eduki jakin horietan. Publizitatea, ordea, non ageri den kontrola ezina da, hau da, hartzaileak ezin du erabaki ikusi edo ez. Gehienbat kalean aurki ditzakegun iragarkiekin gertatzen da hori.

3. Argi dago paradoxa hori posible egiten duen gauza bakarra dirua dela. Kasu argiena tabakoarena da. Ezin da iragarri osasunerako txarra delako, baina debekatu beharrean edozein tabernatan dago salgai. Zergatik? Produktu honek izugarrizko diru sarrerak ematen diolako gobernuari eta hemen ikusten da, benetan ez dela begiratzen kontsumitzaileen osasuna edo ongizatea. Hori ikusarazi nahi da, telebistan iragarki horiek debekatzen, baina errealitatean helburua kontrakoa da.

4. Auto-erregulazioari esker, iragarleek beraien spot batek gerora ekar ditzakeen iskanbila edo iritzi negatiboak aurreikusi eta ekidin ditzakete. Era honetan, nahiz eta ez emititu hasiera batean nahi zen iragarkia, spot seguruago bat argitaratuko da eta honen bidez, iragarleak izen txarra izatea eta galera ekonomikoak izatea ekidin daiteke.

5. Ez nuke mutur batean ere kokatuko nire burua. Nire iritziz, publizitatearen sormenari ez zaio muga judizialik jarri behar, baina iragarleek beraiek ikusi behar dute, beraiek hiritar diren bezala, noraino iritsi daitezkeen helburu ekonomikoak lortzeagatik. Iragarki batzuk moralki onar ezinak izaten dira. Ez dut uste guztia gobernuak kontrolatu behar duenik, iragarleek beraiek kontrolatu behar dituzte beraien ekintzak eta beraiek saltzen dituzten ideia eta irudiak, gizarte guztira iristen baitira, eta pertsona askorengan eragin dezaketelako spot edota bestelako iragarki horiek.

Publizitatea: entretenimendua edo salmenta tresna?

1. Publizitatearen saturazioaren ondorioz, iragarkien eraginkortasuna jaitsi egiten da. Hartzaileak entretenimendu gisa ikusten ditu spotak eta ez dira iragarki horiek saltzen dutenaz jabetzen, beraz, ez dira segur aski gure markarekin gogoratuko. Saturazioaren ondorioz, ikusleen oroimenetan gelditzeko lehen baino intserzio gehiago beharko ditugu, bakoitzak inpaktu gehiago jaso dezan eta hauek lehenengo markarengan erreparatzeko eta gero gogoratzeko.

2. Nahiz eta legeriak publizitate saturazioa erregulatuta eduki, ez du legeria betearazten. Honengatik, inor ez da arduratzen legearen barnean jokatzeagatik aspektu honetan, ia inongo ondorio legalik ez direlako existitzen errealitatean eta ez betetze honek izugarrizko onurak eta irabaziak ekartzen dituelako. Telebista kateek egundoko etekin ekonomikoak izaten dituzte, spot gehiago sartzen dituzte eta horrez gain, gehiago ordaintzen da toki “egoki” edo “errentagarrian” kokatzeagatik norberaren iragarkia; beraz, iragarleek ez dute soilik spotaren prezioa ordaintzen, baita posizionamendu pribilegiatu horren gehigarria. Guzti honen ondorioz, kateek publizitatetik lortzen duten irabazi ekonomikoak itzelak dira.

3. Saturazioa hain handia izanik, norberak bere iragarkia nabarmendu beharra ikusten du. Nabarmentze hau gehienetan originaltasunari esker bilatzen saiatzen da eta era honetan istorioak hartzen du garrantzia; saldu nahi den marka edo produktua bigarren plano batean gelditzen da askotan. Istorioak era dibertigarri batean kontatzen saiatzen dira eta honen ondorioz, ikuslea gustura egoten da iragarkiak ikusten, baina nahiz eta spot bat zer nolako originala zen gogoratu, segur aski iragartzen zuen marka edo produktuaz ez da oroituko. Iragarkiak, beraz, entretenimendu gisa hartzen dute askok eta beraien saltzeko indarra honen azpitik gelditzen da. Artikuluan esaten den bezala, %90 telebista ikusle inguruk saturazio oso handia edo handia dela uste du, baina hau ez dute negatibotzat hartzen, dibertigarria baita.

4. Publizitate jardunean sormenari izugarrizko garrantzia ematen zaio. Irakurri dugun artikuluaren arabera, honen ondorioak beharbada ez dira beti positiboak, nahiz eta istorioa gogoratu gure marka edo produktua ahaztua izan daitekeelako, baina nire iritziz ezinbesteko alderdi bat da publizitatea egiteko orduan. Bestela, ezinezko litzateke gure iragarkia spot guztien artean kokatuta egonda, gogoratua izatea ere.

Iragarkiaren elementuak aztertuz

Klasean ikusi ditugun 10 spotak aztertu ondoren zera esan genezake; klasean aipatu bezala over ahots gehienak (ehuneko oso altu batean) gizonezkoak direla. Emakumezkoa erabiltzen duen spot bakarra egon da eta gainera spot hau haurrentzat zuzendutako esnearen ingurukoa da (Celta esnearena); era honetan ikus genezake, oraindik, gaur egun haurren zaintza nagusiki emakumeen kontu bezala hartzen dela eta hau onartua dagoela bai gizartean eta baita iragarkien munduan ere, gizonezkoa inondik inora ere ez baita ageri iragarkian.

Horrez gain, klasean ospetsuen erabilera soilik iragarkien %10ak erabiltzen dutela ikusi dugu eta ideia hau baieztatu egiten da aztertu ditugun spotekin; beste esparru batean ezaguna den pertsonaia bat hartu eta iragarkian azaltzen diren bi spot soilik ikusi baititugu.
Klasean aztertu ditugun iragarki gehienak emozionalak izan dira eta 10etik seik umorea erabili dute beraien mezua helarazteko.

Jingle.a soilik, iragarki batean agertu da eta honek harritu egin nau, gehiago erabiltzen zela uste bainuen. Baina, zera ikusi dugu, gehienek musika fondo bezala erabiltzen dutela, hamarretik, bederatzik.

Post-testa eta bere emaitzak

KANPAINAREN DESKRIBAPENA
Postest hau egiteko guk aukeratu dugun kanpaina Nespresso. What else? ena izan da, George clooneyk protagonizatzen duena hain zuzen ere.
Iragarki hau McCann Parisek sortu eta Robert Rodriguezek zuzendu zuen. Spot hau estreinatu aurretik iragarlearen web orrialdean ikusi ahal izan zen, baina soilik Club Nespressoko bazkideak zirenek ikus zezaketen. Honen inguruan lehiaketa bat sortu zuten komunikazio kanpainaren barnean. Web orrialdean ez zegoen iragarki osoa ikusgai, irudi batzuk soilik eta partaideek istorioa nondik nora zioan pentsatu behar zuten eta beraien ideiak on line ezarri. Istorio originalena asmatzen zuenak Cannes zine festibaleko 2010. urteko ediziorako bidaia bat irabaziko zuen.

TARGETA
Iragarki honen target zehatza pertsona ezkongabeak dira, baina, orokorrean kafe ona etxean hartzea gogoko duen edozein pertsona. Lehenengo ideia kontuan hartuta, Hollywoodeko urrezko ezkongabea dela protagonista nagusia oso garrantzitsua da gure ustetan, target horrengana zuzenean iristeko.

SARRERA
Postest honek, kanpaina zehatz horrek hartzailearengan izan duen eraginkortasun maila kalkulatzeko balioko digu, efektuak neurtzen lagunduko digu. Test honi esker, targetak gure iragarkia ikusi duen, gogorarazten duen, markarekin identifikatzen duen, sinesgarria eta gustagarria zaion edota gure mezua ulertu zuen jakingo dugu. Era honetan, gure komunikazio helburua bete den ikusi ahalko dugu.

METODOLOGIA
Gure postesta burutzeko hamabi galdera dituen inkesta pasako dugu gure ezagunen artean. Gutxi gora behera hamabost pertsonei egingo diegu galdeketa eta hau gehienbat galdera itxi eta mistoekin egongo da osatua.

KANPAINAREN INPAKTUA
Postest honetan inkestatu ditugun 15 pertsonetatik, 8 emakumezkoak izan dira eta 7 gizonezkoak. Adinari dagokionez, gehienak 15-30 urte bitartekoak izan dira, 6 pertsona zehazki. Horiez gain, 30 – 50 urte bitarteko 5 pertsona eta 50 urtetik gorako beste 4 ere inkestatu ditugu.

Inkestatu guztiak baieztatu digute normalean telebista ikusten dutela eta gogoratzen dituzten 3-4 iragarki aipatzeko eskatzerakoan, hiruk gure iragarkia ikusi dutela ziurtatu digute. Gogoratzen ez dutenei gure galdera zehaztu diegu, eta ospetsu bat ageri den iragarkiak aitatzeko eskatu diegu. 12 hauetatik erdiak gure iragarkia esan dute. Hala ere, beste 6 pertsona daude oraindik gogoratzen ez dutenak eta hauei oraindik gehiago zehaztu diegu galdera, ospetsu hori Hollywoodeko izar bat dela esanez. Argibide honekin 6 horietatik guztiek gogoratu dute gure iragarkia.

Behin gure iragarkia zein den argi azalduta produktuaren eta iragarkiaren inguruko hainbat galdera burutu diegu.

Inkestatuen artean, bederatzik lotu dute iragarkia bera gure markarekin eta hamaikak, nahiz eta batzuk ez gogoratu marka, spotaren istorioa badakite zein den. Iragarkia baloratzerako orduan hainbat ezaugarri aipatu diegu eta beraiek 1tik 5era puntuatu behar izan dute. Gogora erraztasunak, originaltasunak eta dibertigarritasunak puntu altuak lortu dute, batez beste guztiek lauko bat izanez. Aldiz, ulertzeko erraztasunak eta eraginkortasunak batez beste biko nota lortu dute soilik.

Iragarkiaren eraginkortasunari dagokionez, kafe makina hori erostea planteatu diren galdetzean gehiengoak ezezkoa eman digu hainbat arrazoirengatik, jada badaukatelako makina bat edota ez dutelako interesik. Orokorrean, iragarkia deskribatzerakoan bi hitz hauek izan dira nagusienak, elegantzia edo glamourra (Hollywoodeko izar bat agertzen baita, George Clooney) eta kalitatea. Hauetaz gain beste hitz batzuk ere agertu dira, besteak beste, garestiaren inpresioa.

ONDORIOAK
Postest honetatik jaso ditugun erantzunekin ondorio nagusi batzuk atera genitzake. Hasteko iragarkia erraz gogoratzen dela ikusi ahal izan dugu eta honen zergati nagusiak ospetsuaren, kasu honetan Hollywoodeko izarra den George Clooneyren, erabilera eta narrazio batean oinarrituta dagoela dira. Honek erakusten digu zer nolako indarra duen hain famatua den pertsona bat erabiltzeak.

Iragarkiaren eta markaren arteko erlazioa ere nahiko indartsua dela ikusi dugu %60ak lotu baitu spota bere markarekin. Gogora erraztasun hau gehienbat originaltasunagatik da eta baliabide ezberdinekin lortu da, George Clooney agertzen delako narrazioaren protagonista bezala eta istorioak duen umore toke horrengatik gehienbat.

Hala eta guztiz ere, nahiz eta aberasgarria izan iragarkia eta marka ikuslearen memorian geratzera, azken helburura ez da hainbeste arrakastarekin betetzen, hau noski, gure inkestatuen arabera. Izan ere, kafe makina erosiko luketen galdetzerakoan gehiengoak ezezkoa esan digu.

INKESTA
1. Sexua
a) Emakumea b) Gizona

2. Adina

3.Ikusten al duzu telebista normalean?
a)BAI b)EZ

4.Gogoratzen al duzu azkenaldian ikusi dituzun iragarkietako batenbat? Esan 3-4 bat.
(Gure iragarkia esanez gero joan 8. galderara)

5. Gogoratzen al duzu ospetsuak agertzen diren iragarkirik?
a) Bai b) ez
Zein?____________________
(Gure iragarkia esanez gero joan 8. galderara)

6.Eta Hollywoodeko izar bat agertzen den iragarkiren bat?
a) Bai b) Ez
Zein? ___________________
(Gure iragarkia esanez gero joan 8. galderara)

7. Gogoratzen ahal duzu George Clooney aktorea agertzen zen iragarkia?

8. Zein markaren iragarkia zen?

9. Zer gertatzen zen iragarkian?

10. Baloratu ondorengo ezaugarriak:

GUTXI ASKO
- Gogoraerraztasuna 1 2 3 4 5
- Originaltasuna 1 2 3 4 5
- Ulertzeko erraztasuna 1 2 3 4 5
- Eraginkorra 1 2 3 4 5
- Argia 1 2 3 4 5
- Aspergarria 1 2 3 4 5
- Dibertigarria 1 2 3 4 5

11. Iragarkia ikusi ostean, planteatu ahal zara kafe makina hori erostea?
a) Bai b) Ez
Zergatik?________

12. Iragarkia ikusi ostean, zein bi hitzekin deskribatuko zenuke Nespresso marka?

*Ariketa hau Ane Galdos ikaskidearekin batera burutu dut.

Eraginkortasuna saritzen

Eraginkortasuna saritzen dituzten jaialdiak iragarleek antolatzen dituzte, nire ustez, era honetan prestigioa eta izena ona irabazteko. Zuk ordaindu eta onartu duzun kanpaina batek beste guztiek baino eraginkortasun handiago lortu badu, negozioetan maila ona duzula adierazten du. Sektoreko beste marka batzuengandik bereizteko balio dezake, indartsuagoa zarela adierazteko. Gainera, horrelako sari bat lortzea ere publizitatea bikaina izan daiteke. Nahiz eta markentzat irudi ona lortzeko bide paregabea izan, nire iritziz, publizitatea agentzientzat erakusleiho bikaina da beraien lanak beste enpresen aurrean aurkezteko. Prestigioa, markei ez ezik, agentziei ere ematen zaie sari hauekin, azken finean, beraiek egiten dutelako eraginkorra izan den lan hori eta askotan irabazi ezkero saria, eraginkortasuna bilatzen duten enpresek beraiengana joko dute kanpaina burutzera.

Irabazleen zerrenda eta inbertsioen raking.a ikusi ostean zera uste dut, diru asko inbertitzeak kanpaina batean ez duela inola ere ziurtatzen hau eraginkorra izango denik. Inbertsio handienak egin dutenen lehenengo hamar enpresak kontutan hartzen baditugu, horietako bakarrak jaso du eraginkortasun sari bat, zilarrezkoa, Telefonicak. Izugarrizko aurrekontua eskaini diezaiokezu kanpaina jakin bati, baina honek ez badu ikuslegoarekin bat egiten, ez du ezertarako balio izango eta egindako inbertsioa beharbada ez duzu izango bueltan. Beste alde batetik, nahiz eta kanpaina izugarri ona izan eta ikuslegoaren artean arrakasta handia izan, marketingeko beste kontu batzuk (banaketa adibidez) ez badituzu ondo lotzen, alferrikakoa izango da lan guztia eta egindako inbertsioa eta ezingo duzu erakutsi eraginkortasuna.

Facebookeko esperimentua

Facebookean pertsona baten profila sortu nuen nik, eta hortik astebete baino gutxiagora 37 lagun nituen, 70 eskaera inguru eginaz. Guztiak nik bidalitako eskakizunei erantzunak izan dira eta hauek edozein modutan aukeratu nituen, izen bat jarri bilatzailean eta bertatik lagun izateko eskaera eginez. Gero eskaera egiten nien pertsonen lagunak agertzen zitzaizkidan iradokizun bezala eta horietako batzuk ere gehitu nituen. Pertsonai bat sortu nuen eta interneten mutil baten argazkia bilatu nuen profileko argazki bezala jartzeko. Horrez gain, ez nuen ezer gehiago egin, ez nintzen inongo talde edo kausen zalea egin.

Esperimentu honekin zera konturatu naiz, jendeak edonor onartzen duela bere sarean eta era horretan ezertaz ezagutzen ez duzun pertsonak zure bizitzaren berri jakin dezaketela. Hori kezkagarria dela uste dut, jendeak ez du ikusten benetan sare sozialetatik zenbat pertsonek izan dezaketen zure berri. Zure sare sozialean, jada, ez daude zuk ezagutzen dituzun pertsonak, guztiz ezezagunak direnak baita; hori bai, zure onespenarekin. Behin zure sarean sartu ezkero, zure bizitza pribatu guztiaren berri izango dute eta pribatasun eta intimitateak ez dute lekurik izango. Etikoki, zuzena izango ote da zure "txokoa" den orrialdean sartzera helburu komertzial batekin?

Nahiz eta indar asko izan sare sozialek eta jende ugari konektatuta egotea posible egin, nire iritziz, oso zaila izango zen marketing kanpaina arrakastatsu bat egitea sare hauetan oinarrituta soilik; hauek izugarri lagundu dezakete bideoak, dokumentuak edota iritziak zabaltzen (guztiz doan eta lan gutxirekin gainera), baina beste inon ez bada ezaguna kanpaina hori, jende ugari geldituko da kanpaina ikusi gabe; eta mezua jasotzen duten pertsonen artean ere, ez dut uste oso eraginkorra izango denik. Horren adibide, lehenengo ariketan egin genuen esperimentua.